سزای ساڵێک زیندان و ٢ ساڵ دوورخستنه‌وه‌ بۆ چالاکێکی خوێندکاری کورد

ناوه‌ندی هه‌واڵ: چالاکوانێکی کورد سزای ساڵێک زیندان و دوو ساڵ دوورخستنه‌وه‌ی له‌ زێدی خۆی به‌ سه‌ر دا سه‌پێندرا. به‌ گوێره‌ی هه‌واڵی هه‌واڵده‌ری موکریان خوێندکارێکی کورد چالاکی به‌ناوی " به‌ختیار خۆشنام" که‌ له‌ زانستگای زه‌نجان سه‌رقاڵی خوێندن له‌ بواری علومی سیاسی دا بوو، ماوه‌یه‌ک له‌مه‌وبه‌ر به‌ تاوانی پڕۆپاگانده‌ دژ به‌ ڕژیم، له‌ لایه‌ن هێزه‌کانی ئیتلاعاته‌وه‌ ده‌ستبه‌سه‌ر کرابوو، به‌ پێی ماده‌ی ٥٠٠ و ماده‌ی ٢٠ له‌ یاسای سزادانی ڕژیمی ئیسلامی ئێران، له‌ لایه‌ن دادگای شۆڕشه‌وه‌ له‌ شاری سه‌قز، سزای ساڵێک به‌ندکران و ٢ ساڵ دوورخستنه‌وه‌ی بۆ شاری سیرجانی کرمان به‌ سه‌ر دا سه‌پێندرا. جێی باسه‌ که‌ چه‌ند ڕۆژ له‌مه‌وبه‌ر ئیداره‌ی ئیتلاعاتی سه‌قز له‌گه‌ڵ داواکاری پشوو وه‌رگرتنی ناوبراو دژایه‌تی کرابوو.