" به‌یاننامه‌" ساڵێك دوای هەڵبژاردنی دەیەمین دەورەی سەركۆماری

خەڵكی خەباتگێری كوردستان!
هاونیشتمانانی تێنووی ئازادی!
ئۆگرانی رزگاریی ئێران لە دیكتاتۆری و ستەم!
ساڵێك لەمەوبەر دوای زیاتر لە مانگێك بانگەشەو باسی سیاسیی زیندوو و بە دوای چەند حەوتوو ململانیی هەڵبژاردن لە نێوان كاندیداكانی سەركۆماری و لایەنگرەكانیان دا رۆژی 22ی جۆزەردان، دەنگدەرانی ئێران چوونە سەر سندووقەكانی دەنگدان تا دەنگ بە یەكێك لە چوار كاندیدای سەركۆماری بدەن.
پێویستیی رێژیمی کۆماری ئیسلامی بە بەشدارییەكی گەرموگوڕ و هەرچی بەرفرەوانتری خەڵك لە هەڵبژاردنێكی موهه‌ندیسیكراودا، بۆ ئەوەی لە ململانێ نێوخۆیی و دەرەكییەكاندا لافی مەشروعییەتی پێوە لێ بدا لەلایەك و لەلایەكی دیكەوە، هاتنە گۆڕی بەشێك لە داخوازە سیاسی، نەتەوەیی، فەرهەنگی، ئابووری و گشتییەكانی خەڵك لە بەرنامەی دوو كاندیدای ریفۆرمخواز میهدی كەڕووبی و میرحوسێن مووسەوی دا، بووە هۆی ئەوە هەڵبژاردنی دەورەی دەیەم لە كەشوهەوایەكی سیاسیی جیاواز لە دەورەكانی پێشوو دا بەڕێوە بچێ. حیزبی دیموكراتی كوردستان بە خوێندنەوەیه‌کی نوێی هەڵومەرجی نێوخۆیی ئێران، سیاسەتێكی جیاواز لە دەورەكانی پێشووی گرتەبەرو لە جیاتی تەحریمی هەڵبژاردن، داوای لە خەڵكی كوردستان كرد ئەم هەلە بە قازانجی پرسی نەتەویی خۆیان و بۆ هێنانه‌گۆڕی داخوازه‌کانیان بقۆزنه‌وه‌ و ده‌نگی خۆیان بۆ تێکشکاندنی کاندیدای به‌ره‌ی دیکتاتۆری وسه‌ره‌ڕۆیی به‌ رێبه‌ریی سوپا و خامنه‌یی و‌ بۆ سه‌رخستنی ویستی گۆڕان و به‌ره‌وپێش بردنی بزووتنه‌وه‌ی ئازادیخوازی به‌ کار بینن.
وەك دیتمان لە سەرانسەری ئێران دا خەڵك بەشێوەیەكی بەرین لە هەڵبژاردندا بەشداربوون و لە كوردستانیش هەڵوێستی شوێندانان لەسەر رووداوەكان بە قازانجی پرسی نەتەوەیی و بزووتنەوەی ئازادیخوازی و پاشەكشە بە دیكتاتۆری، لە نێو تێكۆشەرانی سیاسی و فەرهەنگی و چالاكانی مەدەنیی نێوخۆو رێژەیەكی زۆری خەڵك دا بە مەعقوول و دروست زانرا و پێشوازیی لێكرا. لە ئاكامدا، كورد لە ئێران جارێکی دیکه‌ هاتەوە نێو معادلاتی سیاسی و سەرنجی كاندیداكان و لایەنە سیاسییە سەرانسەرییەكانی ئێران و زۆر لە میدیاكان و ناوەندە سیاسییەكانی جیهانی بۆ لای خۆی راكێشا.
ئێستا كە دوای سالێك، بە به‌رچاوڕوونییه‌وه‌ ئاوڕ لە رووداوەكانی یه‌ک ساڵی رابردوو دەدەینەوە دەتوانین بڵێین جڵەوبەدەستانی نیزام، بەر لەوەی خەڵك لە رۆژی 22ی جۆزەردان دا بچنە سەر سندووقەكانی دەنگدان، حیسێبیان هاتبووە دەست و پێش بینیی شكستی سەرشۆڕانەی كاندیدای دڵخوازی خۆیان دەكرد. هەر بۆیە هەموو ئامادەكارییەكی پێویستیان بە مەبەستی ساختەكاری بە قازانجی ئەحمەدینه‌ژاد كردبوو. بەلام بەو هەمووە ساختەكارییانەشەوە باشاری دەنگە زۆرەكانی خەڵك بەكاندیدا ریفۆرمخوازەكان بە تایبەتی میرحوسێن مووسەوییان نەكرد. لە ئاكامدا پەنایان بۆ كودەتا لە دژی دەنگەكانی خەڵك برد. ئەوان ئاكامی دەنگدانی خەڵكیان بێ سەرنجدان بە راستییەكان و بەوجۆرەی بۆ خۆیان دیارییان كرد بوو بە خەڵك راگەیاند. بۆ پێشگیری لە تەقینەوەی نارەزایەتیی دەنگدەران و سەپاندنی قسەی خۆشیان، بەر لە راگەیاندنی ئاكامی هەڵبژاردن، حكوومەتی نیزامییان پێک هێنا و هەرچەشنە كۆبوونەوە و هاتنە سەرشەقامێكیان لە خەڵك قەدەغە كرد.
راگەیاندنی ئاكامەكانی هەڵبژاردن و سەپاندنەوەی ئەحمەدینه‌ژاد وەك سەركۆمار بەسەر خەڵكی ئێران لە 23ی جۆزەردان دا، ئەگەر بۆ خامەنەیی و سوپای پاسداران، بڕگەی كۆتایی ئەم هەلبژاردنە بوو، بۆ خەڵكی ئێران سەرەتای بزووتنەوەیەكی تازە لە دژی دیكتاتوریی كۆماری ئیسلامی بوو. ئەم بزووتنەوەیە، بە نارەزایەتیدەربڕین لە ساختەكاری و دەسكاریی دەنگەكان دەستی پێ كرد، بەڵام بەو هۆیەوە كە زۆر زوو دەركەوت لە پشت ئەم ساختەكارییانە و بێڕێزی بە دەنگەكانی خەڵك و پیلانگێڕی و سەركوت بە مەبەستی پێشگیری لە هەرچەشنە گۆڕانێك بە قازانجی خواستی خەڵك، شەخسی خامەنەیی رێبەری نیزام راوەستاوە، دروشمی"دەنگەكانمان كوا؟" جێی خۆی دا بە "مەرگ بۆ دیكتاتۆر".
بزووتنەوی ناڕەزایەتی لە ئاكامە راگەیه‌ندراوەكانی هەڵبژاردن، بە زوویی بوو بە بەستێنێك بۆ ئەوەی زۆرترین ناڕازی لە سێ دەیە دیكتاتۆری و ستەم وجیاوازیدانان لە خۆی دا كۆ بكاتەوەو بە دژی دەسەڵاتدارانێك كە ئەمڕۆ نوێنەرایەتیی رێژیمی كۆماری ئیسلامی دەكەن، بیانهێنێتە سەر شەقامەكان. ئەو بزووتنەوەیە، چەند جار توانی سەرەڕای هەموو هەڕەشەو هێرشەكان، لە شاری تاران وشاره‌گه‌وره‌کانی دیکه‌ ‌بە میلیۆنان خەڵك بێنێتە سەر شەقام و، مەشروعییەتی خامەنەیی وەك رێبەری نیزام، ئەحمەدینه‌ژاد وەك سەركۆمار و ناوەند و دامەزراوەكانی ئەو رێژیمە رەت بكاتەوە و، نەك هەر خەڵك و دەسەڵاتی لە بەرامبەر یەكتردا راگرتوە، بەڵكوو درزێكی گەورەشی خستۆتە ریزی كەسایەتی و سیما دیارەكانی دوێنێ و ئەمڕۆی رێژیمی كۆماری ئیسلامی. بەم جۆرە دەتوانین بڵێین لە یەكساڵی رابردوودا، گەورەترین كۆسپ لە سەر رێی دەسەڵاتدارێتیی كۆماری ئیسلامی، بزووتنەوەی دوای 22ی جۆزەردان بووە و ململانیی خەڵك و دەسەڵات لە چوارچێوەی ئەم بزووتنەویەدا، رەوتی رووداوەكانی دیاری كردوە.
حیزبی دێموكراتی كوردستان، ساڵێك دوای بەڕێوەچوونی هەڵبژاردنی دەیەمین دەورەی سەركۆماری، ئاوڕدانەوە و پێداگرتنەوە لە سەر هێندێك لە هەڵوێست و بۆچوونەكانی خۆی بە پێویستی دەزانێ:
1ـ هەڵوێستی هاندانی خەڵك بۆ بەشداری لە هەڵبژاردندا و كەلكوەرگرتن لە دەرفەتێكی ئەوتۆ بۆ ململانێ لەگەڵ بریاڕبەدەستانی سەرەكیی رێژیم و هێنانە گۆڕو بەرەوپێشبردنی داخوازەكانی خۆیان لە كوردستان و سەرانسەری ئێران لە جێی خۆی دا بوو. بە دڵنیایییه‌و¬ە ئەگەر خەڵك بەرامبەر بەو هەڵبژاردنە بێ تەفاوەت بووایەن، نەشیاندەتوانی بە دژی ئاكامەكانی بێنە سەر شەقام و لەم یەكساڵەدا شایه‌دی ئەم بزووتنەوە گەورەیە و ئەم قۆناغە نوێیە لە ململانیی خەڵكی ئێران و دەسەڵاتی كۆماری ئیسلامی نەدەبووین.
2ـ بەشداریی وشیارانەی خەڵكی ئێران لە هەڵبژاردنی 22ی جۆزەرداندا و هەڵوێستگرتنیان بەرامبەر ساختەكاری و كودەتای سوپا- خامەنەیی دژ بە دەنگەكانی ئه‌وان دەریخست لەوە وشیارترن که‌ رێگا بدەن وەك ئامرازێك بۆ مەشروعییەت دانەوەیەكی رواڵەتی بەم نیزامە بەكار بهێنرێن. ئەوان سەلماندیان سەرەڕای ئازادنەبوون و نادێموكراتیك بوونی هەڵبژاردن لە ئێراندا، بە وشیاری و زیرەكیی خۆیان، لە هەموو دەرفەتێك بۆ پێكهێنانی گۆڕان لە حەددی ئیمكاندا و تێكدانی هاوسەنگیی دەسەڵات بە قازانجی ئازادی و دێموكراسی و بەربەرەكانی لەگەڵ ستەم و دیكتاتۆری كەلك وەرده‌گرن و ئەگەر ئەم رێگایەشیان لێ پووچەڵ بكرێتەوە، بێدەنگ نابن.
3ـ هەم بەر لە وەڕێكەوتنی بزووتنەوەیەك كە به‌ بزووتنەوی سەوز ناوی دەركردوە، هەم دووای ئەو بزووتنەوەیە، جوولانه‌وه‌ی سیاسی، كۆمەڵایەتی و فەرهەنگیی جۆراوجۆر لە ئێراندا هەبوون كە لە وشیاركردنەوەی خەڵك و بەربەره‌كانیی ئەوان بە دژی تەواوەتیی رێژیم یا بەشێك لە یاساو سیاسەتەكان وپێكهاتەكەی دا رۆڵیان هەبووە. بزووتنەوی سەوزیش ئەگەرچی هەم لە باری تەركیبی بەشداران و لایەنگرانییەوە، هەم لە باری دروشم و ویست وداخوازەكانییەوە بەربڵاو، فرەچەشن و رەنگاوڕەنگە ، نەك سەرجەم بزووتنەوەی ئازادیخوازی لە ئێران، بەڵكوو بەشێك لە بزووتنەوەی ئازادیخوازیی خەڵكی ئێرانه‌ و نێوەرۆكێكی دێموكراتیك و پێشكەوتنخوازانەی هەیە.
4ـ خەڵكی كوردستان خاوەنی بزووتنەوەیەكی نەتەوەیی و دێموكراتیكی لەمێژ ساڵەن كە تێكۆشانی چەندین حیزب و رێكخراوی سیاسی و خەباتی گەلی كورد لە رۆژهەڵاتی كوردستان لە پێناوی مافە نەتەوەیی¬یەكانی خۆیانی گرتۆتە خۆ. حیزبی دێموكراتی كوردستان وەك بەشێكی سەرەكی لەم بزووتنەوەیە، هەر ئاڵوگۆڕێك لە ئاستی ئێراندا و به‌ڕێكەوتنی هەر بزووتنەوەیەك لە بەشەكانی دیكەی وڵات كە دژایەتیی دیكتاتۆری و سەرەڕۆیی بكا و ئامانجی هێنانەگۆڕو هێنانەدیی داخوازە ئینسانی و دێموكراتیكەكانی هاونیشتمانان بێ، ئەگەرچی ئەم داخوازانە رادیکاڵیش نه‌بن ، وه‌ک سه‌ره‌تایه‌ک بۆ گۆڕان بە گرنگ دادەنێ. پشتیوانیی حیزبی ئێمە لە بزووتنەوەی سەوزو هەوڵدانمان بۆ راكێشانی سەرنجی ئەم بزووتنەوەیە بۆ لای پرسی كوردو نەتەوە بندەستەكانی ئێران و رەنگدانەوەی داخوازەكانی كورد لە دروشم و ئەدەبیاتی بزووتنەوەی سەوزدا، لەم چوارچێوەیە دایە.
5ـ خەڵكی رۆژهه‌ڵاتی كوردستان لە ماوەی یەكساڵی رابردوودا، نە لە خەبات بۆ داخوازە نەتەوەییەكانی خۆیان و دەنگ هەڵبڕین دژی ستەم و سەركوت و جیاوازیدانانی كۆماری ئیسلامی غافڵ بوون، نە بەرامبەر بزووتنەوەی دوای 22ی جۆزەردان و سەركوتی خەڵكی ناڕازی، بێ تەفاوەت بوون. ئەوان نیشانیان داوە كە بەشكست و پاشەكشەی رێژیمی دیكتاتۆری كۆماری ئیسلامی و گەشەكردن و پێشڕەویی بزووتنەوەی ئازادیخوازی لە بەشەكانی دیكەی ئێران خۆشحاڵ و هیوادارن و لە پێچەوانەكەشی بەداخن. بەڵام خاڵی گرنگ لەو پێوەندییەدا كە دەبێ ئاماژەی پێ بكرێ ئەوەیە كوردستان هەلومەرج، مەنتیق و لێكدانەوەی خۆی هەیە. بەتەنیا مانەوه‌ی دەیان ساڵە لە بەرامبەر شەڕو سەركوتی كۆماری ئیسلامیداو بێ تەفاوەتی و بەدەنگەوە نەهاتنی هاونیشتمانان لە ئاست سەركوتی گەلی كوردو، كەمڕەنگ بوونی پرسی كوردو نەتەوە بندەستەكانی دیكەی ئێران لە ئاخاوتن، نووسین و هەڵوێستی سیماكان و رەوتەكانی بەشداری بزووتنەوەی سەوزدا، وایان كردوە خەڵكی كوردستان دووربینانەو بە پارێزەوه‌ بەرەوڕووی رووداوەكان ببنەوەو بەشداری و پشتیوانی لەم بزووتنەوەیە، بە دووركەوتنەوەی زیاتری بزووتنەوەی سەوز لە ئێستاو رابردووی كۆماری ئیسلامی، قانوونی ئەساسییەكەی و خودی سیستەمەكە و گۆڕینی روانگەی بەرامبەر بزووتنەوەی كوردستان و پرسی نەتەوەیی، ببەستنەوە.
6ـ بزووتنەوەی ناڕەزایه‌تیی دوای 22ی جۆزەردان، دوای یەكساڵ خۆڕاگری لە بەرامبەر سەركوتی هەموو لایەنە، هەروا بەردەوامە. بەڕێوەبەرانی رێژیمی كۆماری ئیسلامی سەرەڕای پەنابردن بۆ كوشتاری بێ بەزەییانەی خۆپێشاندەران لە سەر شەقامەكان، رێكخستنی پەلاماری نیزامی بۆ سەر خوێندكاران لە نێو زانستگەكاندا، ئەنجامدانی تاوانی شەرماوی لە گرتووخانەكان دژی گیراوان، ئیعترافوەرگرتنی زۆرەملی و دادگایی كردنی رواڵەتی و بەكۆمەڵی كەسایەتییە ریفۆرمخوازەكان و ئێعدامی بەندییە سیاسییەكان و شانبەشانی ئەمانەش دەركردنی هەواڵنووسان، داخستنی رۆژنامەكان، پاڕازیت ناردن بۆ سەر تەلەڤیزیۆنە کانی ئۆپۆزیسیۆن، پەكخستن و كۆنترۆڵی ئینتێرنێت و سیستەمی SMS لە كاتی پێویستدا، نەیانتوانیوە كۆتایی به‌ ناڕەزایەتی دەربڕین و بەربەرەكانیی خەڵك بێنن. تەنیا سەركەوتنێك كە ئەو رێژیمە بە دەستی هێناوە ئەوەیە كە بە شێوەیەكی كاتی كۆنترۆڵی شەقامەكانی كردوە بۆ ئەوەی لە بۆنەكاندا جارێكی دیكە رووداوەكانی رۆژی قودس، 16ی سەرماوەزو عاشووڕا دووپات نەبنەوەو بێزراوی و بێ پێگەیی كۆماری ئیسلامی لە نێو خەڵك دا دووپات نه‌بنەوە.
خەڵكی خەباتگێڕی كوردستان!
هاونیشتمانانی ئازادیخواز!
هێزو لایەن و كەسایەتییە دێموكراتیك و نیشتمانپەروەرەكان لە نێوخۆو دەرەوەی وڵات!
حیزبی دێموكراتی كوردستان بە بۆنەی تێپەڕبوونی ساڵێك بە سەر خەبات و خۆڕاگریی پڕ لە قوربانیدانی هاونیشتمانان دژی دەسەڵاتدارانی كودەتاچیی كۆماری ئیسلامی، سڵاو بۆ گیانی تێكڕای شەهیدان و قوربانییەكانی مەیدانی بەربەرەكانی لەگەڵ دیكتاتۆریی كۆماری ئیسلامی دەنێرێ و ئازادیی هەموو گیراوەكانی پێوەندیدار بە رووداوەكانی یەكساڵی رابردوو، هەروەها سەرجەم بەندییە سیاسییەكان داوا دەكا.
ئەزموونی یەكساڵی رابردوو پێمان دەڵێ كۆماری ئیسلامی بە زۆری چەك و سەركوت و بە یارمەتیی بەندیخانە و زنجیرو كوشتن خۆی راگرتوە. بەو حاڵەش خەڵكی ئێران هەر كە دەرفەتێكیان بۆ خۆنواندن و هاتنە شەقام بۆ هەڵ دەكەوێ، نیشانی دەدەنەوە كە هەروا لە مەیداندان و لە سەر كۆتایی هێنان بە دیكتاتۆری لە وڵاتەكەیاندا، شێلگیرن. بەڵام بەردەوامی و لەمەش زیاتر سەركەوتنی بزووتنەوەی دوای 22ی جۆزەردانی 1388، پێویستی بەوە هەیە لە لایەكەوە لە بازنەی تاران و چەند شاری گەورە بێتە دەر، لە لایەكی دیكەشەوە بوون و خۆدەرخستنی خۆی لە هاتنە سەر شەقامدا بەرتەسك نەكاتەوە و مێتۆد و شێوەكانی دیكەی خەبات و بەربەرەكانی، بۆ وێنە مانگرتنی گشتی كە خەڵكی كوردستان تێی دا سەركەوتوو و سەربەرز بوون، بەكار بێنێ. شانبەشانی ئەمانەش، هاوكاری و هاوخەباتیی حیزب و رێكخراوە سیاسییەكان و سەرجەم ئێرانییەكانی دانیشتووی دەرەوەی وڵات بە مەبەستی لەقاودانی تاوانەكانی رێژیم و راكێشانی هاوپێوەندی و پشتیوانیی دنیای دەرەوە بۆ لای ئەم بزووتنەوەیە و خەبات و خۆڕاگریی خەڵكی ئێران پێویستە. بەڵام ئەو مەرجانە كاتێك دێنە دی كە كەسایەتییەكان و رەوتە شوێندانەرەكانی بزووتنەوەی سەوز لە رێگای سنووربەندیی هەرچی زیاتر لەگەڵ یاسای بنەڕەتیی كۆماری ئیسلامی و سیستەمی ویلایەتی فەقیه و رۆیشتن بەرەو نێوەرۆكێكی دێموكراتیك و بایەخدان بە مافی گەلانی ئێران بەتایبەتی گەلی كورد، بۆ گشتگیركردنی بزووتنەوە، تێ بكۆشن.
ئێمە لەحاڵێکدا هاوده‌ردیی به‌رینی ئه‌م دوواییانه‌ی هاونیشتمانان به‌ تایبه‌تی له‌ ده‌ره‌وه‌ی ولات له‌ گه‌ڵ گه‌لی کورد به‌ بۆنه‌ی له‌ سێداره‌درانی رۆڵه‌کانی به‌ سه‌ره‌تایه‌کی جێی دڵخۆشی له‌ هاوپێوه‌ندیی دوو لایه‌نه‌ ده‌زانین، له‌ دەسپێكی دووهەمین ساڵ لە قۆناغی نوێی خەباتی خەڵكی ئێراندا، هەوڵدان بۆ دروستكردنی هاوپێوەندی و هاوخەباتی لە ئاستی كوردستان و ئێران و لە ئاستی حیزب و رێكخراوە سیاسییەكانی كوردستان و ئێراندا بە مەبەستی تین و گوڕبەخشین بە بزووتنەوەی ئازادیخوازی و كۆتایی هێنان بە تەمەنی دیكتاتۆری و سەرەڕۆیی لە وڵاتەكەماندا بە ئەركی خۆمان دەزانین.
حیزبی دێموكراتی كوردستان
دەفتەری سیاسی
22ی جۆزەردانی 1389
12ی ژوئەنی 2010